Vizita Hilarry Clinton ma Timor

Xanana : u me’i karik lalan ysa
Hilarry : lo’o ni edi bouk, ahali ro lima saik!
Xanana : ehmm….
-
Depoizde asudi ro nora Primeiru Ministru nora membru Governu sira, Hillary ti vizita hina Koperativa Kafé Timor.

Laklubar he Lelohalik, Hahi Kaek helin bi Kaek dar

Laklubar oras-nia banas lare-ahuk natukur oi, movimentu ekonómiku banas laután, nain rodi kanauk anak ma rasosa he merkadu badinas dukaduka. Aba ti lelon telu he lei (Kinta 30 de Agostu-2 de Setembru). Uwa’a progresu lak lahelok. La ysa saik ni kura bi kiré hei. Wer he vila lalan maran dudekor oi, naturuk huan ysaysa . Autoridade lokál bi rarai matar, una povu padese nahati ti wer-inun. Komunidade susar raba una asesu ti wer na’i Maromak ysa nia. Bitada t governu hina lo’e ni matan e laek.

(Foto primeiru: Lali wer he Wer-Urun ora BT; segundu: kasi'uk Ru-wun-dumesak, ateke lo serik Aríturis; terseiru/kuartu: merkadu itak, hahi kaek helin bi kaek dar)

Duambata Tiketu Susar dukaduka (dadolin XXX)

Duambata tirakan sisabir

Tiketu he hati-hatin.

Ne benar ti povu rahilas limar

Ne benar ti ita sole ti ma.

Ne susar ti ita povu kiak matan

Ne rihun ti ita povu terus na’in.

Awale ha’e naha, siré ha’e naha

Laduhi ha’e naha, lahís ha’e naha

Sabeon osa meran bi nasei hina

Namu’us bi nakoton momór hui

Namu’us tutuan benar waiwain

Namodek tutuan rihun dukaduka

Amili ni amili hini morin (dadolin XXIX)

Ti Eleisaun Prezidensiál

Amili ni amili hini morin
Rai fiar tiní nodi rai-mata
Karumu larek nia kui ita nobu
Atane larek nia lo mundu matan

Lia Inan / Língua Materna ka Mother Tongue

BILIKA NE HUHU

Aba akerek nora IDÁTE he blog nia tanti u kasek una prezerva nahati ita hahar ynan nia, au bi planeia dar para una promove ka una lu’i para odi anorin he eskola, espesialmente ti eskola bázika sira. U boik ha’e meker, tanti jerasaun uluk ene ba anorin nora ua-kaduak ma bakai rasu’ar bi un bi laun hina, satán ysa ene ne tan liberdade lo’o nia.

Bilika ne huhu para una anorin oler língua materna he ensinu bázika tanti ení polítika nain litak-butin sirak una odi trava prosesu aprendizajen he Timór. Rakasek para hahahuan portugés besa nasae sala… para sira bele rasae nahati ita, ení projetu morin ysa ba odi doba saik ita. Aba su’ar nia tanti au rasik manahu naha ti sira “adesir” maibé pesoalmente abi lahelo hei opiniaun sirak. Atensaun nora kuidadu saik, bilika ne huhu ti sira!

Trajédia Santa Krús 12 Novembru (dadolin XXVIII)

Tabo’as dinakas hanu timor
Makika kalelek rata mundu selor
Ran sisoba naturuk larek hohon bo’on
Alerik nora sero arohan nahati
~
Ran sisoba naturuk larek hohon bo’on
Lotun tikarin silolar nuna larek metan
Espíritu timor nik nasae dukaduka
Domin ukun rasik-wao buras laután
~
Trajédia Santa Krús lo’e ó matan
Makika kalelek lo’e mundu talínan
Lo’e ó matan modi mawa’a ami kalelek
Mi lo’e talina odi sei ami alerik
~
Timor wanan rakasek ukun rasik-wao
Bele terus rata mate luta nahati
Makika kalelek odi tuba betun
Kui lima amutuk ukun rasik-wao
~
Ukun-wao nobu oi terus ha’e hei
Ukun-wao nobu oi alerik ha’e hei
Alerik nora terus aneko emi tulun
Rai mata ti ami povu terus-na’in

Ahi-Oan Matebian nora Masakre Doze Novembru

Hula Outubru tinan ysa nia banas biak raba, tanti una na tama naha lo ni tuban bení banas nahur nora wari, bi wakik tan ta tama oler naha lo lelon FINAFU/ Ahi-Oan Matebian nik, naha nalau oi semana ysa ita hi komemora lelon Masakre Santa Krús he lelon 12 Novembru 2011 ti wai-20. Lelon ene nodi nadada tan mundu odi apoia luta itak he biban ysa lei. Maske nabenu nora ran, Timoranan sira konsege kiré vitória sirak odi ukun rasik-wao. Koba betun ro nora unidade ysa forte biak raba, Timoranan ra luta nahati bi ma’es mate…! Tropa Indonéziu (TNI) ene ba ta kostume kaur bapa lei… sira tariadu nobu rodi rawa’a unidade itak ene ba ta’atudu raba ita waor, ta fiar lahelok te hita ukun rasik-wao. Ukun-wao ti ita anesa “koroa” ysa, ene ita tenke atane betun besa karék oler he lelon yi’ak. Maske Timoranan sira he loo-waban ene ba ranaran waor te UNTAS lei rakasek una ma raselat (infiltra) he ita leet odi sobu oler unidade itak… lalika taridu, tanti ukun-wao wai ysa saik.

Banas (Dadolin XXVII)

Banas

Lelo-banas lare-ahuk tolon
Kakehe banas amós osar
Nain rasole osi lalainak
Karreta motór osi duanbata
~
Lelo-banas lare-ahuk tolon
Banas tuir oras tuir ni klima
Sinál natudu lelohalik naha
Povu huak prepara kui oler namo
~
Lelo-banas lare-ahuk tolon
Nodi haha ulas waen nora ahuin
Nuna nain lalan taridu
Namosu haha-lu’i he ita huhur
~
Lelo-banas lare-ahuk tolon
Banas rata lelo-matan dilua
Wo’ar banas nora lamuruk……
Sei asu rabós... busak nameok……
~
Manu-ahui radu'ur bikoton
Deskansa odi ein oras……
Manu aman rabasar liras……
Rabasar liras kokoreek hanu ita.
~*~

Idá-T Bisiluha Dar (dadolin XXVI)

Haha Ynan (Idáte)/Lian Inan (tetun)/Língua materna (Portugés)/mother tongue (Inglés). Haha ene ta mori ma lak meker nodi nahodi ita. Ita YNAR rasik ni ba domina lau nodi nahodi nanorin ita. Lo’oni, bení ita rasik tenke ta’ahuras una buras nahati lo oin. Ita anesa nain matenek, tenke labele siluha oler ita Hahar Ynan, ita tenke dezenvolve nahati di’i ita wanar ka jerasaun morin sira bele lahelo ka banati tuir ezemplu itak. Buité tada naha malae ni hahan, nahalé siluha oler oi ita hahar ni luli ha’e meker. Au pesoál u orgullu tanti warila u su’ar tetun nain bele ranota sotake ka logat ka ton auk. Nain ratada meker te au nain idáte. Ysa ení nuna au u gosta nora orgullu raba. Tanti u hahak anesa identidade auk. Tantí ení beni u odi idáte u hahak u identidade (ha’u-nia lian – ha’u-nia identidade).

Idáte Bisiluha dar

U mori ma lak oi naha
U mori ma su'ar oi naha
U su'ar banati tuir u ynak
U sei odi su'ar hori u ynak
~
Haha Ynan Idá-T haha auk meker
Bana hodi nanorin rata lelon naran
Haha Ynan Idá-T haha auk meker - Sole rata mene-mene bi siluha dar.
~*~
Idáte la haluha ida (versaun tetun)

Ha’u moris mai iha nanis ona
Ha’u moris mai ko’alia nanis kedas
Ha’u ko’alia hasara ha’u-nia inan
Ha’u rona hodi ko’alia tuir ha’u inan
~
Lia Inan Idáte ha’u-nian nanis
Hakiak hanorin to’o ohin loron
Lia Inan Idáte ha’u-nian nanis
La’o lemo rai seluk la haluha ida

~*~

Ma Oler Naha - Tama Oler Edi (dadolin XXV)

Wakik oi naha bi tama dapur
Wakik oi naha bi rohu wai

Bení…

Lelon ysa nara - wain ysa nara
Lo’e oler naha dapur - rohu oler naha wai
Kudét oler naha - masun oler naha
Odi amamut oler edi - abanas oler edi
Dapur matuan - raumata antigu
Sumadur oler edi - tebe oler edi
Tebe tuir kantiga lisan itak rasik

~*~*~*~*~*~*~*~*~*~*~*~*~