Antigo Companhia C.CAÇ-13 de Laclubar

 

Fatin ne’ebé tenke prezerva, bele dezenvolve tan maibe labele destroe. Nu'udar ita haree iha foto ne’e mak dalan tama ba Kazerna  C.CAÇ-13 Laclubar, ho terminolijía militar portugues nian dehan “Porta de Armas”, nu'udar portaun hodi tama ba Companhia, ita haree mós postu sintenela ne'ebé forsa efetuada ida hamriik hela. Iha parte ne’e paizajen ladún furak ona hanesan uluk tanba autoridade eskola DOMBALA haruka blokeia tiha dalan ne’e. Dalan no paizajen ne’e sei kmo’ok liután bainhira loke fali no funsiona hikas hanesan uluk.

Companhia C.CAÇ-13 hela de'it foto ho naran, tanba hakotu ona nia ezisténsia iha meadu 1975 nu'udar konsekuénsia polítika ultramarino nian hodi fó liberdade ba província colónia sira hodi bele buka rasik sira-nia destinu inklui Timor-Leste ne’ebé biban ne’ebá sei hanaran Timor Portugues. Nune’e ex kazerna ne’e abandonadu durante tinan 24 nia laran, no iha tempu ukun-an nia laran autoridade lokál Laclubar nian hamutuk ho igreja hetan konsensu ida hodi harii Escola Secondária ida ho naran Dom Basílio do Nascimento (DOMBALA). Nune’e, karik ha'u la sala, eskola DOMBALA hahú hamriik hosi tinan 2004 to’o ohin loron.