Empreza Telkomcel estabelese Torneiu Futebol ida ho naran Telkomcel Cup iha munisípiu Manatuto hodi konvida klubu joven hirak-ne’ebé eziste iha munisípiu Manatuto hodi kompete jogu durante fulan 1 Juñu-Jullu 2023 nia laran. Hosi Posto Administrativo Natarbora no Soibada la responde konvite no la marka prezensa, entretantu partisipa iha torneiu refere kompostu de'it hosi posto administrativo Manatuto Vila, Laclo, Laleia no Laclubar. Ho nune’e iha loron 20 de juñu: klubu Laclubar FC kontra no manán Nunber FC ho pontus 5-0; iha loron 22 de juñu: Laclubar FC manán Carlilo FC ho pontus 4-1; no iha loron 28-06-2023 Laclubar FC manán tan Sau-Huhun FC ho pontus 1-0. Nune’e Laclubar sei avansa ba meius finais, no iha loron 02-07-23: Laclubar FC manán Balimas FC ho pontus 1-0 iha meius finais, golu furak ne’e oferese hosi sutu bonitu ida hosi Manuel Soares ho kamizola númeru 13 iha minutu 81 molok jogu remata, no golu bonitu ne’e mak deside Laclubar FC avansa to’o Final.
Iha loron 06-07-23: Laclubar FC
hasoru malu ho Aitehen FC iha kampu Aitehen, Manatuto. Jogu finál ne’e lideradu
hosi árbitu Ameun hosi Manatuto Vila. Primeiru golu fera hosi Laclubar FC iha
minutu 2 primeira parte nian hosi Benjamim Mausoko ho kamizola númeru 11. Tuir fali,
iha minutu 26 akontese sorte at tanba “golu oho-an” 1 hosi jogadór defeza
Laclubar nian rasik ho naran Joanito Maduan kamizola númeru 15, ho nune’e
pontus muda ba 1-1.
Bainhira tama ba segunda parte,
Aitehen hatama fali golu 1 hosi jogadór númeru 9 iha minutu 63 no ho ida ne’e
Laclubar FC tenke lakon ho pontus 1 a 2. Entretantu, antes ne’e iha minutu 51
árbitu Ameun foti kartaun amarelu fó ba Carlo Ario kamizola númeru 10 tanba
jogadór Aitehen FC ida selok monu tiha Ario iha liña 16/ área penalidade (área penalty)
nian, entaun Ario protesta árbitu tanba la hú falta ba jogadór Aitehen ne’ebé
foin selok monu nia, maibé árbitu hasai tiha liafuan tolok ba Ario no foti
kartaun amarelu fó tan ba Ario. Espetadores no supporter sira hosi Laclubar FC sente
la haksolok tanba atitude árbitu nian.
To’o jogu remata pontus nafatin
ho 2-1 ba Aitehen FC, nune’e Aitehen FC mak sai nu'udar primeiru lugar, segundu
lugar ba Laclubar FC, no terseiru lugar ba Balimas FC. Laclubar FC tenke simu
derrota 1-2 ho Aitehen tanba árbitu la neutru (inklina liu ba Aitehen), maske
nune’e, Laclubar FC simu duni rezultadu sein protesta ho espíritu desportivu ne’ebé
forte ho esperansa katak iha futuru foin-sa’e Laclubar on sira tenke sólidu
nafatin ho dixiplina, no forte liután._
Klubu Laclubar FC akompañadu hosi
ofisial treinadór na’in 3 mak señor Olívio Soares (Alibik), señor Mariano E.S
(Marito), no señor Bonifácio (Abony), sira na’in 3 mesak eis jogadór ne’ebé sei ativu hodi fó apoiu ba jogadór foin-sa’e sira Laclubar nian._
