Knanauk Morin ti Na'i-wulun sira (dadolin XXXI)

Se talina sei ti, tatoli morin
Lo'e mata awa'a, ti progresu
Ananu alerik, nakar hori houk
Lu'i, dolik na'i-wulun, odi rai-mata

Knananuk kantiga tutan ma ita
Ananu asudin sae lo houk
Sae lo houk, rata na'i-wulun sira
Se talina odi sei, tetu mela ti.

Vizita Hilarry Clinton ma Timor

Xanana : u me’i karik lalan ysa
Hilarry : lo’o ni edi bouk, ahali ro lima saik!
Xanana : ehmm….
-
Depoizde asudi ro nora Primeiru Ministru nora membru Governu sira, Hillary ti vizita hina Koperativa Kafé Timor.

Laklubar he Lelohalik, Hahi Kaek helin bi Kaek dar

Laklubar oras-nia banas lare-ahuk natukur oi, movimentu ekonómiku banas laután, nain rodi kanauk anak ma rasosa he merkadu badinas dukaduka. Aba ti lelon telu he lei (Kinta 30 de Agostu-2 de Setembru). Uwa’a progresu lak lahelok. La ysa saik ni kura bi kiré hei. Wer he vila lalan maran dudekor oi, naturuk huan ysaysa . Autoridade lokál bi rarai matar, una povu padese nahati ti wer-inun. Komunidade susar raba una asesu ti wer na’i Maromak ysa nia. Bitada t governu hina lo’e ni matan e laek.

(Foto primeiru: Lali wer he Wer-Urun ora BT; segundu: kasi'uk Ru-wun-dumesak, ateke lo serik Aríturis; terseiru/kuartu: merkadu itak, hahi kaek helin bi kaek dar)

Duambata Tiketu Susar dukaduka (dadolin XXX)

Duambata tirakan sisabir

Tiketu he hati-hatin.

Ne benar ti povu rahilas limar

Ne benar ti ita sole ti ma.

Ne susar ti ita povu kiak matan

Ne rihun ti ita povu terus na’in.

Awale ha’e naha, siré ha’e naha

Laduhi ha’e naha, lahís ha’e naha

Sabeon osa meran bi nasei hina

Namu’us bi nakoton momór hui

Namu’us tutuan benar waiwain

Namodek tutuan rihun dukaduka

Amili ni amili hini morin (dadolin XXIX)

Ti Eleisaun Prezidensiál

Amili ni amili hini morin
Rai fiar tiní nodi rai-mata
Karumu larek nia kui ita nobu
Atane larek nia lo mundu matan

Lia Inan / Língua Materna ka Mother Tongue

BILIKA NE HUHU

Aba akerek nora IDÁTE he blog nia tanti u kasek una prezerva nahati ita hahar ynan nia, au bi planeia dar para una promove ka una lu’i para odi anorin he eskola, espesialmente ti eskola bázika sira. U boik ha’e meker, tanti jerasaun uluk ene ba anorin nora ua-kaduak ma bakai rasu’ar bi un bi laun hina, satán ysa ene ne tan liberdade lo’o nia.

Bilika ne huhu para una anorin oler língua materna he ensinu bázika tanti ení polítika nain litak-butin sirak una odi trava prosesu aprendizajen he Timór. Rakasek para hahahuan portugés besa nasae sala… para sira bele rasae nahati ita, ení projetu morin ysa ba odi doba saik ita. Aba su’ar nia tanti au rasik manahu naha ti sira “adesir” maibé pesoalmente abi lahelo hei opiniaun sirak. Atensaun nora kuidadu saik, bilika ne huhu ti sira!